سڵاو ..
زۆر جار شه‌وان ئێشك ئه‌گرم و له‌گه‌ڵ خۆمدا كۆ ئه‌بمه‌وه، محاسبه‌ی خۆم ئه‌كه‌م، له خۆم ئه‌پرسمه‌وه ئایا هۆكاری زوو توڕه‌بونی من و به‌كارهێنانی ووشه‌ی دوور له خۆشه‌ویستیمان به‌رامبه‌ر به یه‌ك چی بێت؟!
چ هۆكارێكی وون له پشته‌وه‌ی ئه‌م مه‌سه‌له‌یه بێت؟! من گۆمانم له‌وه‌دا نیه كه رۆژ له دوای رۆژ و سات له دوای سات خۆشه‌ویستیمان له بره‌و سه‌ندندایه و زیاتر تێكه‌ڵاوی هه‌ست و ناخی یه‌كتر ئه‌بین، هه‌ر شتێكیش من لێره‌دا ئاماژه‌ی پێ بده‌م مانای ئه‌وه‌یه هه‌مان هه‌ستی پێشووم بۆت نیه، به‌لكو زیاتر له ڕابردوو خۆشمه‌وێیت، به جۆرێك ئالوده‌ت بووم تاكه چركه‌یه‌كی ته‌مه‌نم بێ تۆ نابم .
خۆشه‌ویستم! خۆت ئه‌زانی من ئه‌مه چه‌ند ماوه‌یه‌كه به كاتێكی هه‌ستیاردا گوزه‌ر ئه‌كه‌م، توشی چه‌ندین داڕمانی ماددی و مه‌عنه‌وی بووم، تاكه شتێك نه‌ی ڕوخاندبم عه‌شقی تۆیه، بۆیه زۆر جار ڕه‌نگه تۆڵه‌ی ڕووخانه‌كانی تر له خۆشه‌ویستیه‌كه‌ی تۆ بكه‌مه‌وه و هه‌ندێ جار وه‌ك پیویست خۆشه‌ویستی خۆمت بۆ ده‌رنه‌بڕم.
من به هه‌موو جۆرێك قه‌رزاری تۆم، تۆ له‌گه‌ڵ یه‌كه‌مین ناسینت هه‌موو متمانه‌یه‌كت به من به‌خشی، هه‌موو خۆشه‌ویستیه‌كت پێ به‌خشیم، له‌ناو گێژاوێكی به‌هێزدا وه‌ك فریشته‌یه‌كی میهره‌بان ده‌ستت گرتم و ده‌رت هێنام بۆ ناو باخچه‌ی خۆشه‌ویستی و موحیببه‌ت، من ئه‌مانه‌م هه‌مووی له یاده، له یادمه ئه‌و كاتانه‌ی تازه منت ناسی بوو به شه‌رمێكه‌وه به " گیان " وه‌ڵامی منت ئه‌داوه، بیرمه له سه‌ره‌تادا هه‌میشه داوای لێبوردنت لێ ئه‌كردم و ئه‌ت گوت: من خۆشه‌ویستی باش نازانم، ئه‌بێ فێرم بكه‌یت و بمبوری له هه‌ر كه‌م و كوڕیه‌ك.
من تا ئێستا و بۆ ئاینده‌ش به‌و میهره‌بانی و سۆزه‌ی تۆوه ئه‌ژیم، زۆر له‌وه دڵنیابه تا ئه‌به‌د تاكه خۆشه‌ویست و ئازیزی منی، له هه‌ر شتێكی ناخۆش و هه‌ر ده‌نگ به‌رزكردنه‌وه‌یه‌كم به‌سه‌رتا داوای لێبوردن ئه‌كه‌م و خۆم به خه‌جاڵه‌تی ئه‌و میهره‌بانی و نه‌رم و نیانیه‌ت ئه‌زانم.
من له‌سه‌ره‌تای یه‌كتر ناسینمانه‌وه هۆشداری ئه‌وه‌م پێدای كه من توره‌بونم خێرایه و هێمن بونه‌وه‌شم به هه‌مان شێوه، وه به‌ڵێنی ئه‌وه‌شم پێدای بۆ ئه‌به‌د تاكه خۆشه‌ویست و په‌ناگه‌ی دڵم بیت، من ئه‌م نامه‌یه‌م بۆ ئه‌وه نوسی كه دوپاتی بكه‌مه‌وه بۆت، كه چه‌نده قه‌رزاری تۆم، ئه‌زانم زۆرم ئازار داوی، بیرمه له‌به‌ر خاتر دلخۆشیه‌كی من خۆت دایه به‌ر كڕێوه و توشی نه‌خۆشیه‌كی تا ڕاده‌یه‌ك مه‌ترسیدار بوویت، نازانم چیت بۆ بڵێم.. له كاتی نوسینی ئه‌م نامه‌یه‌دا دڵۆپ دڵۆپ ئه‌سرینی چاوم ئه‌ڕژێته به‌رپێم.
ئازیزم.. خۆشم ئه‌وێی تا ئه‌به‌د ...